-    Цагдаагийн ерөнхий газрын автобааз гэж нэрлэгдэн  үйл ажиллагаагаа явуулж байгаа тус бааз тулгын чулуугаа тулж үүсч байгуулагдсанаасаа хойш 80 гаруй жилийн намтар түүхээ шастирлан туурвисааар өнөөгийн өндөрлөгт хүрч иржээ. Монгол оронд үндэсний хувьсгалын ялалтыг бэхжүүлэх, шинэ төр засгийг төвхнүүлэх , улс орны тусгаар тогтнолыг тунхаглах, бүгд найрамдах засаглалыг тогтоох зэрэг нийгмийн их өөрчлөлтийн торгон гарааны үед тус автобаазын үндэс суурь нь тавигдаж үүсч, хөгжиж ирсэн түүхтэй ажээ.

- Дотоодыг хамгаалах газар, Дотоод явдлын яам, Цэрэг ба нийгмийг аюулаас хамгаалах яам, Нийгмийг аюулаас хамгаалах яам, Улсын цагдан сэргийлэх ерөнхий газар, Цагдаагийн ерөнхий газар гэх зэргээр цаг, цагийн түүхэн он жилүүдэд өөр, өөрөөр нэрлэгдэн эх орон, ард түмнийхээ аюулгүй байдлын төлөө эрхэм үүргээ биелүүлсээр ирсэн дээрх төрийн чухал байгууллагуудын салшгүй нэгэн бүрэлдэхүүн хэсэг нь тус автобааз, түүний хөдөлмөрч хамт олон байсаар ирсэн бөгөөд өнөөдөр ч хамт байж цагийн ачааг хамт үүрэлцэн ард түмнийхээ амар амгалан аж амьдралын төлөө аврал ачлал тээсэн алтан шар замаа эвхсээр яваа билээ.

- Ийм баатарлаг түүхтэй, бахархам үйлстэй хамт олны түүх бол зөвхөн алдар гавъяаны түүх байх жамтай ажээ. Тус автобаазын 80 гаруй жилийн түүх бол цаг цагт ажилллаж цадиг түүхээ бүтээлцэж ирсэн үе үеийнхний хөдөлмөр бүтээлийн түүх юм. Тус автобаазын өнөөдрийн өнгө төрх , хөгжил дэвшил бол тэрхүү үе, үеийнхний хамтын бүтээл юм.

- Төр засгаас улсыг аюулаас хамгаалах байгууллага, хилийн цэрэг, засан хүмүүжүүлэх болон цагдан сэргийлэх байгууллагад даалгаж хариуцуулсан эх орны тусгаар тогтнол, эрх чөлөө, ард түмний амгалан тайван байдлыг хангах үйлсэд чекист, хилчид, сэргийлэгчидтэй нэг томилолт, нэг багийн бүрэлдэхүүнд нэг санаа зорилготой явж өвлийн тэсгим хүйтэн, зуны аагим халуунд цаг мөчтэй уралдан, тохиолдсон саад бэрхшээлийг эр зориг, авхаалж самбаатай даван туулж өөрт оногдсон үүргээ амжилттай биелүүлж явсан нэгэн үеийн жолооч, тээвэрчдийн  элж өнргөрүүлсэн он жилүүд бол энэ баазын түүх юм.

...Хэлмэгдлийн шуурга дэгдсэн он жилүүдэд Зис-5 машиныхаа тэвш дүүрэн ачсан гэм зэмгүй "бурхадыг" галт бууны аман дор аргагүйн эрхэнд зөөвөрлөн нүд аниулж явсан тэртээх хар өдрүүдийн аньж гүйцээгүй шарх бас л энэ баазын түүх.

...Эх орны аугаа их дайны жилүүдэд Зөвлөлтийн дайчидтай нэг бүхээгт мөр зэрэгцэн сууж мөндөрлөсөн сумны өөдөөс амь өрсөн тэмцэж явсан тус автобаазын олон арван жолооч дайчдын баатарлаг зориг, туулсан зам, зольсон амь  бас л энэ баазын түүх.

...Эх орныхоо өрнүүн бүтээн байгуулалтад гар бие оролцон улсын аль хэрэгцээтэй газарт шаардлагатай тээвэр хийж, үтрэмийн талбайд дутуу нойртой хонож явсан олон шөнө, идэр есийн хүйтэнд алс аймгууд руу данхайтал ачсан өвс тээвэрлэж даарч хөрч явсан сар өдрүүд, атрын талбайд анхны шан таталцан босоогоороо зүүрмэглэж явсан бор хоногууд,урт холын зам харгуй, ой хээрийн түймэр унтраалцан галзуу улаан галын дундуур ардаа амьдралгүй юм шиг  тэмцэж явсан эр зориг, ийнхүү үе үеийн жолооч, тээвэрчдийн маань нар жаргааж, сар мандуулж явсан эргэж ирэхгүй он жилүүд энэ баазын алдар гавъяаны түүх юм. улсынхаа дархан хил хязгаарыг сахин хамгаалах хэрэгт гар бие оролцож отряд, заставуудын барилгын материал тээвэрлэн хонон өнжин хоол нойргүй зүтгэж явсан

... Ард олныхоо амар амгалангийн манаанд халаагүй зогсож, нийгмийн хэв журам, хууль ёсыг сахиулах, гэмт хэрэгтэй тэмцэх үйл хэрэгт цагдаагийн ажилтнуудтай нэг бүхээгт нэгдмэл зорилготой зүтгэж, өөрт ноогдсон үүргээ биелүүлсээр яваа өнөө үеийн жолооч нарын маань амьдрал тэмцэл, ажил үйлс бүхлээрээ энэ баазын л түүх юм.