- Автобааз үйл ажиллагааныхаа гол хөдөлгөгч хүч болсон инженер техникийн ажилтнууд, жолооч, засварчдынхаа залгамж чанарыг хадгалж, тэд-ний мэргэжил мэдлэгийг дээшлүүлэх, тогтвор суурьшилтай ажиллуулах, тэргүүний хүмүүсийнхээ ажлын арга барилыг түгээн дэлгэрүүлэх талаар байнга анхаарч ирсэн эртний уламжлалтай юм. Боловсон хүчний бодлого чиглэлээ тодорхойлж, ажлын байрны шаардлага хангасан хүмүүсээр хүний нөөцөө бэхжүүлж, тэднийг ажилд нь сургаж дадлагажуулах, эрх ашгийг нь хамгаалах, байгууллага-хамт олны харилцан үйл ажиллагааг холбогдох хууль тогтоомжид нийцүүлэн явуулахад байгууллагын захиргаа ямагт анхаарч ажилладаг.

- Боловсон хүчнийг шилж сонгох, зөв байршуулах, сургаж дадлагажуулах, өсгөж дэвшүүлэх, цол шагнал олгох, алдаа гаргасан тохиолдолд зэмлэл шийтгэл оногдуулах, тэтгэвэр, тэтгэмж олгох зэрэг хүний нөөцтэй холбоотой бүх үйл ажиллагааг холбогдох хууль, эрхийн хүрээнд шийдвэрлэж ажилладаг тул энэ талын санал гомдол гардаггүй болно.

- Төр түмнийхээ төлөө үйлсэд зүтгэж явдаг авралын элч болсон жолооч, засварчдынхаа мэдлэг, мэргэжлийг дээшлүүлэхэд байнга анхаарч тэдний дунд зохион явуулдаг албаны болон мэргэжлийн сургалтыг жил дутам чанаржуулж арга хэлбэрийг нь боловсронгуй  болгосоор байна.Хамт олноо үнэн бодит мэдээллээр тогтмол хангаж, цаг үеийн мэдрэмжтэй байх нөхцөлийг бүрдүүлж, тэдний албаны болоод мэргэжлийн бэлтгэлийг өндөржүүлж ур чадвар, сахилга хариуцлагыг дээшлүүлж байх нь сургалтын ажлын эрхэм зорилго юм.

- Автобааз хэдэн үеийн туршид энэхүү эрхэм зорилгоо байнга биелүүлж ирсэн. Тиймээс энэ хамт олны дотроос ажлын хариуцлага алдаж алба хохироох, хэрэг зөрчилд холбогдох явдал гарч байгаагүй бөгөөд харин сайшаал, шагнал хүртэж ирсэн нь олон юм. Тус баазын хамт олон дотроос албан тушаал ахиж, дэвшиж дээшилсэн хүн цөөнгүй байгаагийн дээр жолооч, засварчдаас их дээд сургууль дүүргэн цол хэргэм ахисан хүн олон бий. Тус хамт олон дотроос жолооч Ж.Нүрдэн 2001 онд Монгол улсын гавъяат тээвэрчин цол хүртсэний дээр олон арван алба хаагч төрийн дээд одон медалиар шагнуулж ирсэн. Өнөөдөр энэ хамт олны дунд "Онц тээвэрчин" , "Осолгүй манлай" жолооч 12 ажиллаж байгаагийн дээр Цагдаагийн ерөнхий газрын ажил мэргэжлийн аварга ажилтан 2, "Цагдаагийн алдар", "Цагдаагийн гавъяа" цол тэмдэгтэн, бусад салбарын тэргүүний ажилтан цол тэмдэгтэн хүмүүс хэдэн арваараа ажиллаж байна.

- Энэ бүхэн бол тус автобаазын хамт олон хөдөлмөрийн бахдам амжилт үзүүлж, сайн бүхний манлайд явж ирсэн түүхэн замналын үр дүн юм.

- Ийнхүү энэ байгууллагын өнөөгийн өндөрлөгт хүрсэн амжилт ололт, байр суурь, өнгө төрх бол эрт цагаас уламжлагдаж ирсэн ажилсаг хичээнгүй хамт олны үе үеийн бүтээн босголтын түүх юм. Энэхүү бүтээн босголтод гар бие оролцож, өөр өөрсдийн намтар баян түүхээ бичилцэж ирсэн алдар гавъяат ахмадуудын тоо эдүгээ зуу хол давсан байна. Энэ олон ахмадуудаа эргэж халамжлах, тэднийхээ ажлын баялаг туршлагаас залуу үедээ өвлүүлэх нь бид бүхний ариун зорилго билээ.Энэ зорилгоо ч бид биелүүлсээр байгаа.

- Тус автобааз нь үүсч байгуулагдсан цагаасаа эхлэн өөрийн үүрэг зорилгоо ямарч үед ямагт ханган биелүүлж, үе үеийн удирдах дээд байгууллагынхаа удаа дараагийн авч хэрэгжүүлсэн арга хэмжээний ачаар аж ахуйн талаар бэхжиж, боловсон хүчнээр хангагдаж, гадаад орнуудын техникийн тусламж хүртэж, удирдан зохион байгуулах авъяасаараа хамт олноо зөв зохион байгуулж ирсэн үе, үеийн шилдэг дарга нар, гар сэтгэл нийлсэн хамт олны хөдөлмөр зүтгэлийн үр дүнд бүх талаараа орчин үеийн авто аж ахуйн түвшинд хүрч хөгжиж ирсэн юм.